Kom over eit bilete på nettet, ei gammal framside av eit blad. Frå 1952. Det er jo kanskje passande nok for å kunna visast her i seg sjølv, men, eg såg litt nærare på boka som ligg på bordet …
«How to confuse your neighbours»
Vel – det fekk meg jo til å tenkja på mine naboar. Er dei forvirra over meg, og kven eller kva eg er? Eg presenterer meg ikkje forskjellig frå nokre av dei, eg er meg sjølv heile tida eg, men altså – eg blir kalla både ein kjekk mann og søt dame …
Eg har skrive om denne videoen tidlegare. Originalen finst stadig på YouTube, men eitt eller anna har skjedd. Ein annan versjon vart posta seinare, reparert, men utan starten. Det var jo litt dumt, syntest eg.
Sååå – eg kombinerte litt eg, og fiksa litt, så no er tittelsidene og startskriket tilbake. Undertittelen viser jo med éin gong kva situasjonen er.
Gammal, men dog – skadar ikkje med ein repetisjon, eller?
OK, denne bloggen har ikkje akkurat sett så mykje aktivitet i nokså mange år no, og brått har den eit litt nytt design. Så kva skjer?
Spørsmål og svar
Kvifor har bloggen vore død så lenge?
Fordi eg ikkje har oppdatert den!
Og grunnen til det då?
Det er mange grunnar til det, men mesteparten er nok relatert til PTSD og følgjene av det som eg til slutt ikkje greidde å overvinna; konsentrasjonen og energien var vekke, og ein del fysiske plager. Sistnemnde har heldigvis blitt betre, om ikkje heilt vekke.
Vil eg starta opp igjen no då?
Det er det eg satsar på, for eg har lenge irritert meg over situasjonen. Så no vil eg prøva igjen.
Greier eg det?
Eg kryssar fingrane. Har fått litt ekstra inspirasjon ei stund no, så …
Og kor ofte vil eg blogge?
Vel, basert på det eg har sagt over så tør eg jo ikkje lova for mykje. Eg håpar eg greier å blogge kvar veke, men det er betre å blogge irregulært enn ikkje i det heile. Synest eg då, for min eigen del.
Og innhaldet?
Vil vera mykje det same som før, reknar eg med:
Personlege opplevingar, nye og gamle
Interessante artiklar frå nettet
Videoar
Musikk
Bilete
Historiar
Og elles får eg sjå på kva innspel eg kan få etter kvart.
